Actualizada v2.2. 29 de abril

Prema no enlace para accader o pdf do proceso de instalación: Instalación Carmucha



Carmucha VST – Versión 2 xa dispoñible 🚀

A nova versión de Carmucha VST chega con melloras importantes pensadas para facer o teu fluxo de traballo máis rápido, cómodo e profesional.

🔹 Agora en formato VST3

Maior compatibilidade e mellor rendemento nos DAWs actuais.

🔹 Reprodución mellorada de patróns

Os patróns reprodúcense automaticamente a medida que os seleccionas, permitíndoche traballar dunha forma moito máis fluída e creativa.

🔹 Novo panel de preaxustes

Garda as túas propias configuracións directamente dentro do plugin: volumes, efectos, EQ, paneos… Todo listo para reutilizar cando queiras.

🔹 Tooltips informativos

Cada botón inclúe unha pequena descrición para que saibas exactamente que fai en todo momento.

🔹 Corrección de erros

Solucionáronse fallos e problemas reportados polos usuarios da versión anterior.

Instalación e recomendacións ⚙️

Aínda que non é obrigatorio, recoméndase desinstalar a versión anterior de Carmucha antes de instalar esta nova versión para evitar posibles conflitos.

Durante a instalación do arquivo (.exe en Windows ou .pkg en macOS), é recomendable desactivar temporalmente o antivirus, Windows Defender ou o sistema de seguridade de macOS (Gatekeeper), xa que ás veces poden bloquear a instalación do plugin. Unha vez instalado, podes activalos de novo sen problema.

Se tes calquera inconveniente durante a instalación ou uso do plugin, non dubides en contactar co soporte.

Por último, agradécense moito as túas reseñas, opinións e tamén vídeos ou audios onde mostres as túas creacións con Carmucha VST 🙌

Carmucha VST é a primeira ferramenta de percusión galega libre, accesible e de balde. Ofrece dúas versións: versión VST para producións musicais en DAW e versión Standalone para escritorio.

Carmucha inclúe unha ampla serie de patróns rítmicos con velocidade variable que o usuario pode reproducir directamente dentro do plugin, axustar a velocidade e, cando atope o que máis lle gusta, arrastralos á súa pista de gravación.

O plugin divídese en dúas seccións principais:

• Sección de Foliada: simula unha foliada real, reproducindo todos os instrumentos de percusión. Aquí, o usuario pode acceder ao panel de mesturas para variar volume, paneo e canal de cada instrumento individual durante o tempo que soa a foliada.

• Sección de instrumentos individuais: permite seleccionar un a un cada instrumento (3 tipos diferentes de pandeireta, 2 tamborís, pandeiro e bombo), reproducir os seus patróns e arrastralos á súa pista de gravación.

Ademais, Carmucha inclúe:

• Panel de Axustes dinámicos: para modificar golpes, ataque e release de cada instrumento.
• Panel de FX: para engadir reverb e compresión.
• Panel EQ: para equalizar cada instrumento ao detalle.

O plugin conta cun total de 250 patróns rítmicos que inclúen muiñeiras, xotas, pasodobres e rumbas. Carmucha está dispoñible para Windows e mac en versión Standalone, VST e AU.

Características:

• Primeira ferramenta de percusión galega, libre, accesible e de balde.
• Dispoñible en VST, AU e Standalone (Windows e Mac).
• Máis de 250 patróns rítmicos: muiñeiras, xotas, pasodobres e rumbas.
• Seccións de Foliada (todos os instrumentos xuntos) e Instrumentos individuais (pandeiretas, tamborís, pandeiro e bombo).
• Paneles de mesturas, FX e EQ, con axustes de velocidade e dinámicos para un son perfecto.